Fréttir

Áfram líða dagarnir í desember og við færumst nær jólum. Í þessari viku unnu nemendur ýmis verkefni, undirbjuggu menntabúðirnar og opna húsið sem verður n.k. mánudag og margt fleira. Við fengum heimsókn frá Hugrúnu og Elvar í tónlistarskólanum sem aðstoðuðu okkur með jólasöngstund sem var mjög skemmtileg, þau ætla að koma aftur til okkar í næstu viku. Í gær spiluðu nokkrir nemendur skólans á jólatónleikum tónlistarskólans og stóðu sig með stakri prýði. Við erum mjög stolt af tónlistarskólanum okkar og því frábæra starfi sem þar er unnið og hvetjum ykkur til að fylgjast með fréttum úr þeirra starfi á heimasíðunni þeirra. Litlu jól nemenda verða 19. desember og ætlum við að halda okkur við fyrirkomulagið sem við höfum verið með undanfarin ár hvað varðar pakkaskiptin. Í ár hafa nemendur kosið að styrkja Velunnarasjóð Skagastrandar og Skagabyggðar líkt og í fyrra og koma nemendur ekki með pakka heldur óskum við eftir því að hvert heimili leggi 1000 krónur í púkk ef heimilin hafa tök á. Starfsfólk skólans mun einnig styrkja sjóðinn í stað þess að skiptast á gjöfum. Í dag fer elsta systkini á hverju heimili heim með umslag og þar má setja aurinn í og loka fyrir áður en því er skilað aftur í skólann. Styrknum verður svo skilað til sjóðsins á litlu jólunum. Mánudaginn 11 .desember n.k. verður opið hús og menntabúðir hjá okkur frá kl. 16:00-18:00 í Höfðaskóla og hvetjum við öll sem vilja til að koma við hjá okkur, sjá hvað nemendur eru að fást við og skoða skólahúsnæðið. Þann dag ætlum við einnig að vera með jólapeysudag og hvetjum alla sem vilja til að mæta í jólapeysum. Þriðjudaginn 12. desember n.k. heldur nemendafélagið jólaskemmtun í íþróttahúsinu fyrir 1.-4. bekk frá kl. 16:30-18:00. Þar verður án efa líf og fjör. Miðvikudaginn 13. desember n.k. stendur foreldrafélagið okkar svo fyrir viðburð í skólanum frá kl. 17:00-19:00 þar sem nemendur geta komið með sín eigin piparkökuhús og skreytt þau. Nemendur þurfa að mæta í fylgd með fullorðnum. Fimmtudaginn 14. desember n.k. verður svo jólaball hjá leikskólanum þar sem eldri systkini mega mæta með og verða eflaust margir nemendur frá okkur á þeirri skemmtun. Það er því ansi margt framundan og alveg eðlilegt að ekki sé hægt að taka þátt í öllu. Það er ekki síður mikilvægt að staldra aðeins við og njóta augnabliksins með fólkinu sínu. Við minnum á mikilvægi þess að nemendur borði og sofi vel þegar annirnar eru svona miklar. Við vonum að þið njótið helgarinnar Með góðum kveðjum Sara Diljá og Guðrún Elsa

Nemendur í áhugasviðsvalgreininni skreyttu piparkökur í dag og höfðu gaman af. Það er alltaf gaman að brjóta upp hefðbundna kennslu af og til. Fleiri myndir hér.

Í dag fengum við góða gesti í heimsókn þegar Hugrún Sif og Elvar Logi tónlistarkennarar komu til okkar og leiddu jólasöngstund. Það er alltaf gaman að brjóta aðeins upp skóladaginn og heppnaðist stundin vel. Við erum mjög þakklát fyrir gott samstarf við tónlistarskólann okkar. Fleiri myndir hér.

Litlu jól nemenda verða 19. desember nk. og ætlum við að halda okkur við fyrirkomulag undanfarinna ára þ.e. engin pakkaskipti á litlu jólunum, bæði hjá nemendum og starfsfólki skólans. Óskað er eftir því að hvert heimili leggi 1000 krónur í púkk, ef heimilin hafa tök á. Síðastliðin tvö ár hafa nemendur kosið að styrkja Velunnarasjóð Skagastrandar og Skagabyggðar en hann er til að aðstoða fjölskyldur og einstaklinga á svæðinu sem minna mega sín. Nú á næstu dögum munu stjórnendur skólans fara í umsjónarstofur nemenda og biðja um hugmyndir að sjóðum og/eða málefnum til að styrkja. Ef þú, kæri lesandi, lumar á góðu málefni til að styrkja þá endilega hafðu samband.

Í dag hafa nemendur í 1.bekk dundað sér við að skreyta dagatöl fyrir komandi ár. Myndirnar eru allar ýmist teiknaðar eða klipptar úr mjólkurfernum sem búið er að halda til haga síðan jólamjólkin fór að koma í búðir sl. okt. Myndir hér

Fyrsta blað Höfðafrétta var gefið út í dag en blaðið er eingöngu gefið út rafrænt að þessu sinni og má lesa það hér.

Heil og sæl Enn ein vikan flogin hjá og 1. desember mættur. Í þessari viku voru nemendur á unglingastigi í list- og verkgreina lotu þar sem þau voru í heimilisfræði. Þau gerðu margt skemmtilegt eins og að fræðast um matarmenningu, næringarfræði, baka og hjálpa til við hádegismatinn upp í Fellsborg. Allt gekk þetta vel og var ekki annað að sjá og heyra en nemendur væru ánægðir. Úti er kalt og dimmt og við minnum enn og aftur á að mikilvægt er að nemendur séu vel klæddir og með endurskinsmerki. Framundan er ýmislegt skemmtilegt í desember en mikilvægt er að gleyma ekki heimalestrinum í öllu amstrinu. Lestrarstund er góð samverustund. Í skólanum er ýmislegt skemmtilegt framundan í desember og má þar nefna söng á sal, jólaföndur stöðvar, menntabúðir, jólapeysu dag og margt fleira. Í næstu viku eru jólatónleikar hjá nemendum í tónlistarskólanum en þeir verða haldnir í Hólaneskirkju fimmtudaginn 7. desember kl. 17:00 og við hvetjum að sjálfsögðu öll til að mæta þangað. Við vonum að þið njótið þessarar fyrstu helgi í aðventu Með góðum kveðjum Sara Diljá og Guðrún Elsa

Nemendur í 1. bekk fengu góða heimsókn frá fulltrúum Kiwanis klúbbsins og Lögreglunnar á Norðurlandi vestra þegar Kiwanis klúbburinn færði nemendunum endurskinsvesti í gjöf. Vestin koma sér vel núna í svartasta skammdeginu. Takk kærlega fyrir heimsóknina og þessa góðu gjöf.

Heil og sæl Vikan sem nú er að líða var heldur betur skemmtileg í Höfðaskóla. Á mánudaginn kom skólahópur leikskólans í heimsókn til okkar en fréttir og myndir frá því má sjá hér. Á mánudaginn var einnig nemendaþing haldið í skólanum þar sem stjórnendateymi skólans hitti nemendur á öllum stigum og rædd voru ýmis mál. Það var margt áhugavert sem kom fram um atriði sem nemendur vildu ýmist bæta eða voru ánægðir með. Allt eru þetta hlutir sem við tökum til skoðunar og bregðumst við ef þurfa þykir. Það skiptir okkur miklu máli að hlusta á raddir nemenda. Þriðjudag, miðvikudag og fimmtudag voru svo stigsskemmtanir sem heppnuðust mjög vel. Frétt og myndir frá því má sjá hér. Skólablaðið Höfðafréttir er í þann mund að verða tilbúið til birtingar og verður vonandi gefið út í næstu viku. Að þessu sinni verður blaðið rafrænt og við hlökkum til að sýna ykkur afrakstur vinnunnar hjá valgreinahópnum sem að blaðinu stendur. Tíminn æðir áfram og desember er handan við hornið. 1. desember er á föstudaginn í næstu viku en þann dag ætla allir bekkir að gera eitthvað í tengslum við þann merka dag, fullveldisdaginn. Við vonum að þið njótið helgarinnar Með góðum kveðjum Sara Diljá og Guðrún Elsa

Í þessari viku var mikið um að vera hjá okkur þegar skemmtanir voru haldnar á öllum stigum. Á þriðjudaginn hittust nemendur í 1.-3. bekk ásamt fjölskyldumeðlimum og skreyttu piparkökur, gerðu jólakort, máluðu jólastjörnur og gæddu sér á veitingum sem foreldrar lögðu til. Notaleg á skemmtileg stund. Á miðviku- og fimmtudag voru svo skemmtanir hjá 4.-10. bekk þar sem þau stigu á stokk með ýmis atriði og leiki og enduðu svo í Pálínuboði með sínum fjölskyldum. Allt var þetta mjög vel heppnað og mæting góð. Við þökkum öllum sem komu og áttu skemmtilegar stundir með okkur kærlega fyrir komuna. Myndir má sjá hér.