Fréttir

Í morgun fengu nemendur í 8.-10. bekk heimsókn þegar Þorgrímur Þráinsson kom með fyrirlesturinn Verum ástfangin af lífinu. Nemendur fengu í kjölfarið ýmsar spurningar til að vinna með og verkefni sem haldið verður áfram með í lífsleikni. Við þökkum Þorgrími kærlega fyrir komuna.

Í dag tóku nemendur úr Höfðaskóla þátt í ljósagöngu sem haldin var í tengslum við ljóslistahátíðina Light Up hér á Skagaströnd. Nemendur á yngsta- og miðstigi sem nú eru í myndmennt hjá Kristbjörgu Dúfu fóru í listasmiðju í Nes listamiðstöð og unnu þar ýmis verk sem þau voru með í göngunni. Skemmtilegt verkefni sem allir höfðu gaman af. Það er mjög mikilvægt fyrir okkur að taka þátt í viðburðum í samfélaginu og samstarf Höfðaskóla við listafólkið í Nes listamiðstöð er alltaf skemmtileg tilbreyting frá hefðbundinni verkefnavinnu. Myndir frá undirbúningnum og deginum í dag má sjá hér.

Að þessu sinni kemur föstudagskveðja á fimmtudegi þar sem á morgun, föstudaginn 26. janúar verður starfsdagur hjá öllu starfsfólki sveitarfélagsins. Í vikunni var ýmislegt brallað, nokkrar nýjar valgreinar fóru af stað eftir annarskipti og er margt spennandi framundan í þeim. Nemendur í 1.-3. bekk bökuðu vöfflur og nemendur á unglingastigi fengu heimsókn frá FNV sem kynnti fyrir þeim námið sem þar er í boði. Skólahópur leikskólans kom í heimsókn en samstarfið milli Höfðaskóla og Barnabóls er gott. Það er alltaf líf og fjör þegar vinir okkar koma í heimsókn. Í næstu viku kemur Þorgrímur Þráinsson og heimsækir 8.-10. bekk og einnig munum við halda uppá 100 daga hátíð í 1. bekk og fagna þeim merka áfanga að þau hafi lokið 100 dögum í grunnskóla. Meira um það síðar. Á morgun munu nemendur okkar taka þátt í ljósagöngu sem farin verður í tengslum við Light Up ljósahátíðina. Farið verður frá hafnarhúsinu kl. 17:30 og gengið að Nes listamiðstöð og hvetjum við öll til að taka þátt í þeirri göngu. Við vonum að þið njótið helgarinnar Með góðum kveðjum Sara Diljá og Guðrún Elsa

Stelpurnar í 1.-3.bekk og í skólahóp leikskólans steiktu vöfflur í tilefni af bóndadeginum sem er á morgun. Vöfflurnar snæddu þær ásamt drengjunum í sömu árgöngum í kaffitímanum.

Þó að það sé ekki mikill snjór hjá okkur um þessar mundir er ýmislegt hægt að brasa í því sem þó er eins og sjá má á meðfylgjandi mynd þar sem þessar ungu dömur mynduðu snjóhjörtu í frímínútum.

Vikan í Höfðaskóla var með aðeins óhefðbundnu sniði þar sem það var viðtalsdagur s.l. þriðjudag. Viðtölin voru vel sótt og þökkum við öllum sem komu kærlega fyrir komuna, það er alltaf gaman að fá foreldra og forráðamenn inn í skólann. Í vikunni hóf Hrafnkell Heiðarr Sigurðarson störf í frístund og þann 5. febrúar n.k. mun Jenný Lind Sigurjónsdóttir koma inn í afleysingar sem stuðningsfulltrúi. Við bjóðum þau bæði velkomin í okkar góða hóp. Vikan var frekar köld og við minnum á mikilvægi þess að nemendur séu vel klæddir. Oft liggur okkur á út á morgnanna og þá er gott að hoppa í strigaskó og húfan vill gjarnan gleymast heima, en við skulum hjálpast að við að muna eftir því að klæða okkur eftir veðri. Nemendur í textíl teiknuðu á efni og saumuðu púða. Myndir hér. Næsta vika verður stutt í annan endan þar sem starfsdagur verður hjá öllu starfsfólki sveitarfélagsins föstudaginn 26. febrúar þar sem við munum hlusta á fræðslu um ýmis mál. Við vonum að þið njótið helgarinnar. Með góðum kveðjum Sara Diljá og Guðrún Elsa

Heil og sæl Nemendur Höfðaskóla eru í óða önn að ljúka við þau verkefni sem þurfa að klárast fyrir annarlok og kennarar á fullu í námsmatsvinnu þar sem vorönn hefst 17.janúar. Þriðjudaginn 16.janúar verður skipulagsdagur/viðtalsdagur og ættu allir foreldrar/forráðamenn að hafa fengið aðgang að Mentor til að geta skráð sig í viðtal hjá umsjónarkennara. Sú nýjung verður í ár að hægt er að bóka viðtöl við stjórnendateymi til viðbótar við viðtöl við umsjónarkennara og eru alveg valfrjáls. Veðrið er síbreytilegt og við minnum á að mikilvægt er að nemendur komi vel klæddir í skólann. Gott er að hafa auka par af sokkum með í skólatöskunni. Að lokum minnum við á hafragrautinn góða sem Haddý töfrar fram á hverjum morgni og er í boði frá 7:45. Einnig er ávaxtastund á mánudögum, miðvikudögum og föstudögum og því ekki þörf á að koma með nesti þá daga. Við vonum að þið njótið helgarinnar Með góðum kveðjum Sara Diljá og Guðrún Elsa

Heil og sæl og gleðilegt nýtt ár. Það var afskaplega skemmtilegt að hitta nemendur aftur eftir gott jólafrí. Vikan var stutt og var ekki annað að sjá en að nemendur væru glaðir að vera komast aftur í rútínu, svona flest a.m.k. :) Framundan eru ýmis verkefni sem við ætlum að ljúka fyrir annarskipti, en ný önn hefst eftir foreldraviðtöl sem haldin verða þriðjudaginn 16. janúar. Þann dag geta foreldrar/forráðamenn einnig bókað sér viðtalstíma hjá Söru Diljá, Guðrúnu Elsu eða Berglindi Hlín, kjósi þeir svo, en viðtölin eru bókanleg inn á Mentor. Umsjónarkennarar auglýsa svo skráningar fyrir sín viðtöl. Við vonum að þið njótið þrettándans um helgina og kveðjið jólin sátt og sæl. Með góðum kveðjum Sara Diljá og Guðrún Elsa

Nemendur á yngsta stigi fóru í dag og heimsóttu hesthúsið þar sem Fjóla kennari er með hestana sína. Það var ansi glatt á hjalla bæði hjá nemendum og fjórfætlingum. Það er þakkarvert þegar hestaeigendur eru tilbúnir að taka á móti börnum og leyfa þeim að njóta nálægðar við dýrin.

Heil og sæl Nú er árið að líða undir lok og kjörið að renna aðeins yfir hvað á daga okkar í Höfðaskóla hefur drifið árið 2023. Við erum dugleg að setja fréttir á heimasíðuna okkar og við hvetjum öll til að fylgjast með þar. Í janúar fengum við heimsókn frá Þorsteini V. Einarssyni sem heldur úti miðlinum karlmennskan og nemendur unnu ýmis verkefni. Annar skipti voru eftir miðjan janúar og þá voru foreldrasamtöl. Í febrúar fór 10. bekkur í heimsókn í Menntaskóla Borgarfjarðar, við héldum uppá afmæli vináttubangsanns Blæs, fengum góða heimsókn frá FNV, FabLab og Sýndarveruleika ehf og fengum góða gesti þegar allir viðbragðsaðilar á svæðinu komu og sýndu tækin sín á 1-1-2 deginum. Þá fór 10. bekkur í heimsókn í FNV í lok febrúar. Í mars var m.a. framsagnarkeppnin okkar og nemendur heimsóttu Nes listamiðstöð og unnu verkefni. Alþjóðadagur stærðfræðinnar var haldinn hjá okkur og við fengum góða heimsókn frá Landanum. Í apríl fóru nemendur 9. og 10. bekkjar á skyndihjálparnámskeið, við fengum heimsókn frá Umboðsmanni barna og nemendur unglingastigs fóru á Hvammstanga í tvo daga og unnu verkefni á vegum List fyrir alla. Þá enduðum við apríl á danskennslu. Í maí perluðum við af krafti fyrir Kraft, nemendur fóru í vorferðir, 10. bekkur til Danmerkur og miðstig fór á íþróttadag á Hvammstanga. Skólaslitin okkar voru svo í Fellsborg og nemendur héldu í sumarfrí eftir gott skólaár. Í ágúst var skóli settur og nemendur mættu endurnærðir eftir sumarfrí. Í september hittu nemendur í 6. og 7. bekk Gunnar Helgason á fjarfundi og við fengum heimsókn frá tveimur lögreglumönnum frá Lögreglunni á Höfuðborgarsvæðinu. Við unnum verkefni í tengslum við dag íslenskrar náttúru og 4. og 5. bekkur heimsótti Árnes. Í október var valgreinadagur unglingastigs haldinn á Skagaströnd og 7. bekkur fór í Reykjaskóla. Í nóvember fengum við heimsókn frá skáldum í skólum, héldum nemendaþing, gengum mílu umburðarlyndis og stigsskemmtanir voru á öllum stigum. Desember kom svo með öllu sem honum fylgir og við brölluðum margt eins og birst hefur á heimasíðunni undanfarna daga, m.a. menntabúðir og opið hús ásamt öllu jólatrallinu. Í gær, 19. desember voru litlu jólin okkar haldin. Myndir frá þeim degi má sjá hér. Það er alltaf nóg um að vera hjá okkur, við erum afskaplega þakklát þegar samfélagið tekur þátt í viðburðum með okkur og vonumst til að fá ykkur í heimsókn sem oftast á nýju ári. Skólinn er hjartað í samfélaginu okkar og saman eigum við að standa vörð um hann, tala fallega um skólann og skólastarfið og vera stolt af öllu því frábæra sem nemendur eru að gera. Nemendur mæta aftur samkvæmt stundaskrá þann 4. janúar 2024. Við vonum að þið eigið góð og gleðileg jól og þökkum ykkur fyrir samstarfið á árinu sem er að líða. Með jólakveðju Sara Diljá og Guðrún Elsa