Höfðaskóli
Tilkynningar
-
Einkunnarorð skólans eru: styrkur - vinsemd - virðing
-
Skóladagatal 2025-2026, smelltu hér
Fréttir
-
Föstudagskveðja
13.03.2026Kæru foreldrar og forráðamenn, Að baki er annasöm vika. Hjá nemendum í 4.–10. bekk hefur vinnan við Matsferil Menntamálastofnunar verið í forgrunni. Lagt er mat á lesskilning og stærðfræði og hafa sumir hópar þegar lokið sínum prófum á meðan aðrir eiga þau eftir. Við höfum til loka marsmánaðar til að ljúka þessum prófum. Á yngsta stigi ríkti mikil gleði og eftirvænting í vikunni. Finnbogi undirbjó sérstakan íþróttadag þar sem nemendur fóru í íþróttahúsið og skemmtu sér konunglega ásamt starfsmönnum frístundar. Þá vakti það gríðarlega lukku þegar yngstu nemendurnir fengu að heimsækja geiturnar hennar Dagnýjar. Myndir hér Við viljum einnig deila því með ykkur að framkvæmdir innanhúss ganga vonum framar. Smiðir eru nú nánast búnir að setja upp nýtt kerfisloft og LED lýsingu í allar kennslustofur, ásamt því að endurnýja lýsingu í eldhúsi, matsal og í forstofu nemenda. Þetta mun bæta vinnuumhverfi barnanna til muna og skapa bjartara og þægilegra námsumhverfi. Fram undan er spennandi vika. Á fimmtudaginn næstkomandi fer unglingastigið í heimsókn á Hvammstanga. Þar verður haldinn sameiginlegur valgreinadagur þar sem nemendur frá Skagaströnd, Blönduósi og Hvammstanga hittast og vinna saman að skemmtilegum verkefnum. Þetta er frábært tækifæri fyrir nemendur til að efla félagsleg tengsl og kynnast jafnöldrum sínum á svæðinu. Sama dag, fimmtudaginn, verður tvöfaldur vinnudagur hjá starfsfólki Höfðaskóla. Unnið verður til klukkan 19:00 og fá starfsmenn í staðinn frí 24. apríl næstkomandi. Að lokum viljum við minna á að undanfarna daga hefur verið mikill snjór og bleyta utandyra. Þar sem börnin eru dugleg að fara út er mjög gott að þau hafi auka sokka og jafnvel auka vettlinga með sér í skólann svo þau geti verið þurr og hlý allan daginn. Við þökkum ykkur fyrir gott samstarf og óskum ykkur gleðilegrar helgar. Guðrún Elsa og Berglind Hlín -
Föstudagskveðja
06.03.2026Heil og sæl Þá er kominn mars. Fjölbreytt vika að baki, dálítið rót þar sem iðnaðarmenn voru hér að setja upp hljóðdempandi kerfisloft og LED lýsingu í kennslustofur unglingastig, miðstig og hjá nemendum á yngsta stigi. Íþróttatreyjudagurinn var í dag, skemmtilegt að sjá mismunandi lið, íþróttir og liti, fjölbreytnin var frábær. Fjórða námslota Höfðaskóla er að byrja. Í námsvísi skólans kemur fram hvaða grunnþáttúr úr Aðalnámskrá Grunnskóla verið er að vinna með og hvaða áhersluþættir eru þar undir. Samþættingarverkefni lotunnar ber nafnið Ferðalag. Bekkjarhóparnir munu einhverjir læra um okkar ylhýra Ísland og aðrir halda út fyrir landsteinana og leggja jafnvel í heimsreisu. Þriðjudaginn 10.mars verður haldin umfangsmikil netfræðsla fyrir bæði nemendur og foreldra á vegum foreldrafélagsins og Heimilis og skóla. Síðdegis, á milli kl. 17:00 og 19:00, er svo boðað til mikilvægrar samveru fyrir foreldra þar sem unnið verður með Farsældarsáttmálann. Dagskráin hefst á 30 mínútna kynningu og í kjölfarið verða vinnustofur í heimastofum hvers bekkjar. Markmiðið er að halda samtali milli foreldra um farsæld barna áfram: hvað er okkur mikilvægt í uppeldi barna? Dæmi geta verið skjátími, útivistartími, samskipti, leik barna og fleira. Við hvetjum til mætingar, málefnið er brýnt. Íþróttadagur yngsta stigs verður næstkomandi miðvikudag, 11.mars, en það er Finnbogi íþróttakennari ásamt starfsfólki frístundar sem sjá um það. Skólinn ásamt Fram eru að undirbúa skíðaferð og berast upplýsingar um leið og dagsetning liggur fyrir. Með góðum kveðjum Guðrún Elsa og Berglind Hlín -
Föstudagskveðja
27.02.2026Nemendur 10.bekkjar heimsóttu FNV, skoðuðu skólann og heimavistina og kynntu sér námsframboð ásamt því að sjá leiksýninguna Stella í orlofi - frábær heimsókn eins og alltaf takk fyrir okkur FNV. Risjótt veður, en snjórinn gleður krakkana og rassaþoturnar hafa verið mikið notaðar í vikunni. Nemendu frístundar duttu í lukkupottinn þegar þau voru að renna sér í gær og gátu fylgst með steypuvinnu í leiðinni, sem reyndist hin mesta spenna. Glitruðum í dag, bæði nemendur og starfsfólk, til að sýna stuðning og samhug með Einstökum börnum. Í næstu viku hefst fimmta námslota vetrarins. Námsmat fer að detta inn hjá nemendum og nýjar námslotur að verða fljótlega tilbúnar og fara þær inn í námsvísi skólans í næstu viku. Síðastliðin tvö ár hefur 7.mars verið íþróttatreyjudagur hér í skólanum og ætlum við að halda þeirri hefð en færa daginn fram um einn og hafa hann þetta árið 6.mars. Að lokum viljum við minna á að dyr skólans eru ávallt opnar. Það er okkur mikil ánægja að fá fólk úr samfélaginu í heimsókn til að fylgjast með því flotta starfi sem nemendur okkar inna af hendi dag frá degi. Þið eruð hjartanlega velkomin að kíkja við og þiggja kaffisopa. -
Glitraðu með einstökum börnum
23.02.2026Föstudaginn 27. febrúar verður glitrandi dagur í Höfðaskóla en þann dag ætlum við að glitra með Einstökum börnum og vekja þannig athygli á degi sjaldgæfra sjúkdóma og heilkenna. Á heimasíðu Einstakra barna má finna ýmsar upplýsingar sem gott er fyrir öll að kynna sér. "Glitraðu með okkur með því að klæðast einhverju glitrandi eins og glimmeri eða pallíettum. Allt sem er litríkt og glitrar er skemmtilegt og minnir okkur á að við erum allskonar" -
Föstudagskveðja
20.02.2026Heil og sæl Vikan var stutt hjá okkur, aðeins þrír skóladagar eftir gott vetrarfrí. Hingað í skólann mættu svo hinar ýmsu furðuverur á miðvikudaginn, öskudag, og var kennslu slitið klukkan 12:00 og héldu nemendur þá af stað í söng leiðangur um samfélagið. Foreldrafélög leik- og grunnskólans stóðu svo fyrir öskudagsskemmtun í félagsheimilinu Fellsborg og er ekki annað að heyra á nemendum en að þau hafi skemmt sér mjög vel. Myndir hér. Nemendur í 1. og 2. bekk skelltu sér í leiðangur í góða veðrinu í morgun og skoðuðu spjallbekkinn fyrir víkina ásamt því að rifja upp gamla takta og leika sér á lóð leikskólans. Myndir hér. Næsta vika er síðasta vika febrúarmánaðar og eina vika mánaðarins þar sem eru fimm heilir skóladagar. Nemendur 10.bekkjar halda yfir á Sauðárkrók fimmtudaginn 26.feb og heimsækja FNV. Skoða skólann, fræðast um námsframboð og lýkur heimsókninni með leiksýningunni Stella í orlofi í uppsetningu nemendafélags FNV. Föstudaginn 27. febrúar verður glitrandi dagur í Höfðaskóla en þann dag ætlum við að glitra með Einstökum börnum og vekja þannig athygli á degi sjaldgæfra sjúkdóma og heilkenna. Á heimasíðu Einstakra barna má finna ýmsar upplýsingar sem gott er fyrir öll að kynna sér. Við vonum að þið njótið helgarinnar Með góðum kveðjum Guðrún Elsa og Berglind Hlín -
Föstudagskveðja á fimmtudegi fyrir vetrarfrí
12.02.2026Sæl öll Vikan sem er að líða var heldur betur fjölbreytt. Síðastliðinn miðvikudag var 1-1-2 dagurinn en hann minnir okkur á neyðarnúmer allra landsmanna, 112. Það er mikilvægt að minna á þetta númer af því þetta er eina númerið sem landsmenn þurfa að þekkja í neyð. Við fengum í heimsókn til okkar slökkvilið, lögreglu, sjúkrabíl og björgunarsveit, nemendur fengu að fara út og skoða bílana og spjalla við viðbragðsaðila.Einnig komu í heimskókn Sigrún Líndal og Telma Bjarnadóttir og kynntu, fyrir öllum nemendum skólans, hutverkt sitt sem vettvangsliðar. Við þökkum öllum þeim sem komu að þessum degi kærlega fyrir, ómetanlegt fyrir nemendur skólans að fá að sjá tækjakost sem og hitta viðbragðsaðila og geta spurt spurninga. Myndir frá þessum degi hér. Í morgun voru nemendur 1. og 2. bekkjar með leiksýningu. Nemendur úr elstu tveim árgöngum leikskólans Barnaból komu á generalprufu kl. 9:00 og svo mættu foreldrar og aðstandendur ásamt mið og unglingastigi skólans kl. 11:00. Frábær sýning hjá krökkunum og allir stóðu sig gríðarlega vel. Myndir frá sýningunni hér. Nú er framundan vetrarfrí í Höfðaskóla föstu-, mánu- og þriðjudag og kennsla hefst aftur miðvikudaginn 18.febrúar. Þann dag ætlum við að halda upp á öskudaginn, mæta í búningum og gera okkur glaðan dag. Nemendum 1.-4.bekkar stendur til boða að mæta í frístund og fara með hópnum milli fyrirtækja og syngja fyrir nammi. Vonandi ná allir að hlaða batterýin og koma hress og spæk úr vetrarfríi. Með góðum kveðum Guðrún Elsa og Berglind Hlín
