Fréttir

Heil og sæl Næst síðasta skólavikan á þessu skólaári er nú að renna sitt skeið. Veðrið leikur við okkur og nemendur keppast við að leggja lokahönd á námsmatsverkefnin sín. Næsta vika verður uppbrotsvika hjá okkur. Á mánudag og þriðjudag eru hefðbundnir skóladagar hjá 1.-9. bekk en 10. bekkur ætlar í smá útskriftarferð þá daga, á miðvikudag er útivistardagur þar sem hvert stig fyrir sig sér um skipulag. Á fimmtudag verður flippíþróttadagurinn okkar frægi og þann dag endum við á því að grilla pylsur áður en nemendur halda í sumarfrí. Frístund verður með hefðbundnu sniði þessa fjóra daga. Föstudaginn 29. maí verður starfsdagur og skólaslit. Skólaslitin munu fara fram í Fellsborg og hefjast kl. 17:00. Við minnum á, að ef einhver vill að tekið sé tillit til 2 metra reglunnar við sig, er ekkert mál að verða við því, hafið þá samband við okkur. Nánari útfærsla á 2 metra reglunni og fjöldatakmörkunum verður kynnt á mánudag og með þeim útfærslum ættum við að geta haldið skólaslitin okkar með hefðbundnu sniði. Við vonum að þið njótið helgarinnar Með góðum kveðjum Sara Diljá og Guðrún Elsa

Heil og sæl Vikan í Höfðaskóla gekk vel og við höfum unnið ýmis verkefni. Námsmat er í fullum gangi og inn á milli höfum við nýtt góða veðrið og farið út. Í næstu viku vonum við að veðrið haldi áfram að leika við okkur og hægt sé að flytja kennsluna utandyra að hluta til. N.k. fimmtudag er svo uppstigningardagur og þann dag verður ekki skóli. Vorskýrsla skólapúlsins er nú aðgengileg á heimasíðu, hana má HÉR Við vonum að þið njótið helgarinnar Með góðum kveðjum Sara Diljá og Guðrún Elsa

Samkvæmt lögum um grunnskóla nr. 91/2008, 36. gr. ber öllum grunnskólum að framkvæma kerfisbundið sjálfsmat á starfsemi sinni. Megintilgangur með sjálfsmati er að kanna hvort tekist hafi að ná markmiðum skólans, að greina veika og sterka þætti skólastarfsins og bæta það sem bæta þarf en um leið styrkja jákvæða þætti.

Sæl öll Nú er síðasta vikan með breyttu skólahaldi að renna sitt skeið. Á mánudaginn ganga nemendur aftur inn í þær stundatöflur sem þau höfðu fyrir samkomubann og lífið fer í aðeins meiri rútínu aftur :) Þó svo að starfsfólk skólans hafi verið meðvitað um hversu gott skólasamfélagið á Skagaströnd er áður en covid ástandið skall á erum við enn sannfærðari um það nú að Höfðaskóli á góða að á öllum vígstöðum. Enn og aftur langar okkur að þakka ykkur, kæru foreldrar, forráðamenn, ömmur, afar og allir aðrir velunnarar fyrir samstarfið undanfarnar vikur. Það hefur auðveldað þær skipulagsbreytingar sem ráðist var í að hafa gott fólk með okkur í liði. Nú höldum við áfram og klárum skólaárið með stæl :) Allar líkur eru á að skólaslitin þetta árið verði með breyttu sniði. Við bíðum eftir fyrirmælum og munum upplýsa ykkur um fyrirkomulag skólaloka þegar nær dregur. Á morgun er 1. maí og því frí í skólanum. Við vonum að þið njótið helgarinnar, við sjáumst á mánudag - í rútínu :) Kærar kveðjur Sara Diljá og Guðrún Elsa