Fréttir

Heil og sæl Vikan í Höfðaskóla gekk vel og það var margt um að vera. Snjálfur álfur hefur verið í heimsókn á yngsta stigi og tekið upp á ýmsu. Í gær var fyrsti söngsalurinn okkar í desember og fengum við góða heimsókn frá Ástrós Elís sem leiddi sönginn af sinni alkunnu snilld. Í dag var svo náttfatadagur hjá nemendum og starfsfólki og boðið var upp á heitt og kalt kakó og piparkökur í nestistímanum. Í næstu viku verður engin sundkennsla og fara nemendur í íþróttir í staðin svo það er mikilvægt að hafa með sér íþróttafötin. Við ætlum að bralla ýmislegt síðustu dagana fyrir jól. Á mánudag verður verður smá jólagleði fyrir yngsta stig og aldrei að vita nema rauðklæddir karlar komi við hjá okkur. Á þriðjudag verður jólaföndur frá 10:00-11:30 þar sem nokkrar stöðvar verða í gangi og nemendur geta valið sér föndur. Þá verður einnig í boði að horfa á jólamynd fyrir þá sem ekki vilja föndra. Á miðvikudag verður jólasöngsalur þar sem Ástrós Elís leiðir söng. Á fimmtudag ætlum við að eiga notalega jólastund saman. Við förum í kirkjuna, hlustum á jólasögu sem Ástrós Elísdóttir les fyrir okkur uppúr nýju bókinni sinni, Jól undir Spákonufelli, syngjum nokkur jólalög og höfum gaman. Í hádeginu fáum við svo möndlugrautinn sem Stína okkar, Kristín Kristmundsdóttir ætlar að aðstoða okkur við að útbúa. Ein möndlugjöf verður fyrir hvern bekk og það verður spennandi að sjá hverjir verða hinir heppnu í ár :) Það verður ekki matur í Fellsborg þennan dag og enginn skóli eftir hádegi hjá mið- og unglingastigi. Frístund verður með hefðbundnu sniði. Á föstudag verða svo litlu jólin okkar. Nemendur mæta í skólann kl. 9:00 og verða til 12:00. Við ætlum að dansa í kringum jólatré þar sem Hugrún Sif spilar undir fyrir okkur og Ástrós Elís leiðir sönginn eins og svo oft áður :) Engin frístund þennan dag heldur halda allir heim í jólafrí á hádegi. Frekari upplýsingar um litlu jólin munu berast foreldrum/forráðamönnum frá umsjónarkennurum. Höfðaskóli er einstaklega heppinn að eiga hæfileikaríkt og gott fólk í kringum sig sem kemur til aðstoðar við hin ýmsu tilefni. Við erum komin í jólaskap og ætlum að njóta síðustu daganna fyrir frí saman. Við vonum að þið njótið helgarinnar Með góðum jólakveðjum Sara Diljá og Guðrún Elsa

Nemendur á miðstigi voru að vinna með stöðurafmagn, athuguðu hvort væri hægt að beygja vatn, kveikja á ljósaperum með batteríi og læra að skipta um klær á innstungum. Mjög fróðlegt og skemmtilegt.

Nemendur skólans hittust í dag og sungu saman nokkur jólalög undir stjórn Ástrósar Elísdóttur.

Við vorum í Techno-art í myndmennt þessa vikuna, bæði yngri krakkarnir og eldri fengu að spreyta sig á þessu apparati og bjuggu til mörg falleg listaverk!

Nokkrir vaskir piltar af miðstigi tóku sig til í morgun og mokuðu inngang skólans að sunnanverðu. Þökkum við þeim kærlega fyrir uppátækið.

Tveir fulltrúar fyrsta bekkjar í Höfðaskóla þau Helgi Karl Baldursson og Snædís Stefanía Davíðsdóttir sáu að þessu sinni um að tendra ljósin á jólatré okkar Skagstrendinga á Hnappataðatúni. Nemendur yngsta stigs dönsuðu svo í kringum jólatréð og sungu jólalög. Allir fengu svo heitt kakó og piparkökur uppí skóla að athöfn lokinni.

Sæl og blessuð Nú er desember genginn í garð og við ætlum að reyna að brjóta upp hefðbundið skólastarf og létta lund nemenda eins og kostur er. Í dag var jólapeysudagur hjá nemendum og starfsfólki sem vakti lukku. Á mánudag er stefnan að nemendur á yngsta- og miðstigi fari og verði viðstaddir þegar ljósin verða tendruð á jólatrénu okkar. Eingöngu nemendum yngsta- og miðstig stendur þetta til boða vegna þeirra samkomutakmarkana sem eru í gildi. Mikilvægt er að nemendur mæti vel klæddir en við ætlum að syngja nokkur jólalög og dansa kringum jólatréð. Þegar við komum aftur í skólann fáum við okkur heitt kakó og piparkökur. Á miðvikudag í næstu viku ætlum við vera með jólasöng, þar sem allir nemendur (vonandi, ef samkomutakmarkanir leyfa), hittast og syngja saman nokkur jólalög. Við höfum samið við Ástrós okkar Elís að aðstoða okkur við að leiða sönginn. Á föstudag í næstu viku verður svo jólanáttfata/náttfatadagur hjá öllum, bæði nemendum og starfsfólki og boðið verður upp á heitt og kalt kakó í nestistímanum þann daginn. Litlu jól nemenda verða 18. desember og ætlum við að halda okkur við fyrirkomulagið sem við tókum upp í fyrra hvað varðar pakkaskiptin. Í ár hafa nemendur kosið að styrkja Neistann, styrktarfélag hjartveikra barna og koma nemendur ekki með pakka heldur óskum við eftir því að hvert heimili leggi 1000 krónur í púkk ef heimilin hafa tök á. Starfsfólk skólans mun einnig styrkja Neistann í stað þess að skiptast á gjöfum. Í næstu viku fer elsta systkini á hverju heimili heim með umslag merkt verkefninu og þar má setja aurinn í og loka fyrir áður en því er skilað aftur í skólann. Styrknum verður svo skilað til Neistans á litlu jólunum. Í fyrra fengum við fregnir af því að fleiri en heimili grunnskólabarna vildu leggja söfnuninni lið. Ef einhverjir bæjarbúar vilja taka þátt í þessu verkefni með okkur og leggja málefninu lið er hægt að hafa samband við skólastýrur í síma 4522800 eða á saradilja@hofdaskoli.is og gudrunelsa@hofdaskoli.is Við vonum að þið njótið helgarinnar Með góðum kveðjum Sara Diljá og Guðrún Elsa

Þegar veðrið er vont kemur maturinn til okkar. Í dag voru það skólastýrur sem sáu um að skammta. Plokkfiskurinn var einstaklega góður og krakkarnir ánægð með fyrirkomulagið.

Eru þið hin dugleg að borða grænmeti og ávexti ? Við vorum svo heppin að fá úthlutaðan 50.000 króna styrk frá Kjörbúðinni til kaupa á ávöxtum og grænmeti. Við þökkum Kjörbúðinni kærlega fyrir þennan góða stuðning