Höfðaskóli

Nemendur Höfðaskóla spiluðu páskabingó í dag og skapaðist skemmtileg stemning í tilefni páskanna. Fjölbreyttir og glæsilegir vinningar voru í boði, og nutu nemendur þess að taka þátt og eiga notalega stund saman. Ekki fengu öll vinning sem vildu en það er hægt að draga lærdóm af því :) Nemendafélagið vill koma á framfæri innilegu þakklæti til eftirfarandi fyrirtækja og aðila fyrir rausnarlegan stuðning og vinninga: Skíðadeild Tindastóls Vilko Hólanes Viva Hársnyrtistofa Þórdísar Teni N1 Skagfirðingabúð Kaupfélag Vestur Húnvetninga Kjörbúðin Skagaströnd Gránu Bistro Stuðningur sem þessi skiptir miklu máli fyrir félagslíf nemenda og er afar vel metinn. Nemendafélagið þakkar kærlega fyrir stuðninginn og óskar öllum gleðilegra páska! Skemmtileg stund - myndir hér.

Síðasta vikan fyrir páskafrí var lífleg og skemmtileg hjá okkur. Nemendur unnu ýmis verkefni og nutu veðurblíðunnar þess á milli. Í gær fengum við góða heimsókn þegar nemendur í 2.-.4. bekk sáu leikritið Krakkarnir í hverfinu en það er leikþáttur þar sem brúður eru notaðar til að fræða börnin um ofbeldi og mikilvægi þess að börn segi frá. Í dag stendur nemendafélagið svo fyrir páskabingói fyrir alla nemendur skólans sem verður spennandi :) Við höldum svo í páskafrí eftir daginn í dag og mætum aftur í skólann þriðjudaginn 22. apríl. Vikan eftir páska verður óhefðbundin þar sem sumardagurinn fyrsti kemur á fimmtudeginum eftir páska og því bara skóli þriðjudag, miðvikudag og föstudag. Síðustu vikurnar fyrir sumarfrí verður svo nóg um að vera, íþróttadagur unglinga mun fara fram á Hvammstanga, við ætlum að vera með umhverfisdag, íþróttadagur miðstigs fer fram í Húnabyggð og margt fleira - nánar um það síðar. Við vonum að þið eigið góða páska og hlökkum til að hitta nemendur endurnærð eftir gott frí Með páskakveðju Sara Diljá, Guðrún Elsa og Berglind Hlín

Á miðvikudaginn fengu nemendur í tilraunavali skemmtilega heimsókn frá krökkunum í frístund. Nemendurnir höfðu undirbúið fjölbreyttar og spennandi tilraunir sem þeir sýndu gestunum sínum. Á meðal tilrauna má nefna hraðfrjósandi vatn, heimagerðan hraunlampa og oobleck-slím sem breytir hegðun sinni eftir því hvort það er hreyft eða ekki. Nemendurnir útskýrðu af mikilli fagmennsku hvað tilraunirnar sýndu og svöruðu spurningum yngri krakkanna með bros á vör. Krakkarnir í frístund voru mjög áhugasamir og höfðu greinilega gaman af heimsókninni. Þegar þau voru spurð hvað hefði verið skemmtilegast, áttu þau erfitt með að velja – allt var svo spennandi! Myndir hér.

Í dag tóku nemendur þátt í skemmtilegu útinámi þar sem þeir æfðu kortalæsi, upplýsingalestur og leiðsögn. Verkefnið fór fram á tjaldsvæðinu og var unnið í fimm hópum. Hver hópur faldi sinn fjársjóð og bjó til kort sem leiddi að honum. Síðan skiptu hóparnir á kortum og leituðu að fjársjóðum hvers annars. Nemendur þurftu að lesa kortin, fylgja leiðbeiningum og sýna sköpunargleði við gerð eigin korta. Verkefnið efldi læsi, samvinnu og gagnrýna hugsun á lifandi og skemmtilegan hátt. Þetta er hluti af markvissu starfi við að samþætta nám og leik í daglegu skólastarfi.