Fréttir

Heil og sæl kæru foreldrar/forráðamenn Senn líður að skólabyrjun og nú er ljóst að skólasetning fer fram með svipuðu sniði og síðasta haust v. Covid takmarkana. Við vonuðumst til að geta haft hefðbundna skólasetningu en svo verður því miður ekki. Skólasetning Höfðaskóla fyrir skólaárið 2021-2022 fer fram mánudaginn 23. ágúst. Nemendur mæta beint í skólann en ekki í kirkjuna eins og vaninn er og mikilvægt er að aðeins annað foreldrið eða annar forráðamaðurinn fylgi hverju/m barni/systkinum. Vinsamlegast athugið að grímuskylda er fyrir foreldra/forráðamenn. Tímasetningar á skólasetningu eru: 9:00 - yngsta stig 9:30 - unglingastig 10:00 - miðstig Í haust eru skráðir 70 nemendur í Höfðaskóla sem er fækkun á milli ára. Breyting verður á dagafjölda en við förum úr 175 dögum í 180 skóladaga. Breytingar hafa orðið á starfsmannahaldi síðan á síðasta skólaári. Ástrós Elísdóttir, Ílóna Sif Ásgeirsdóttir og Lilja Dögg Hjaltadóttir hafa allar látið af störfum og þökkum við þeim kærlega fyrir gott samstarf. S. Agnes Sævarsdóttir er í leyfi og Inga Jóna Sveinsdóttir í barneignarleyfi. Elva Þórisdóttir er komin aftur til starfa eftir námsleyfi. Í ár verður Erna Berglind Hreinsdóttir umsjónarkennari 1. og 2. bekkjar, Vigdís Elva Þorgeirsdóttir 3. og 4. bekkjar, Halla María Þórðardóttir og Þorgerður Þóra Hlynsdóttir skipta með sér umsjón hjá 5.-7. bekk og þær Dagný Rósa Úlfarsdóttir og Elva Þórisdóttir hjá 8.-10. bekk. Frístund verður starfrækt með svipuðu sniði og undanfarin ár og er hún í boði fyrir nemendur á yngsta stigi eftir að venjulegum skóladegi lýkur. Starfsmenn frístundar skólaárið framundan eru Erna Ósk og Judith Maria. Frístund verður í boði endurgjaldslaust fyrir alla nemendur á yngsta stigi út ágúst. Eftir það hafa aðeins skráðir nemendur aðgang að frístund en skráning fer fram hér. Skráning í frístund veturinn 2021-2022 Mötuneytið okkar verður áfram staðsett í Fellsborg og geta foreldrar skráð börnin sín í mat hér. Skráning í mat veturinn 2021-2022. Ekki verður gerð krafa um lágmarksskráningu (hægt að skrá sig á einn dag þess vegna). Skráning þarf að berast fyrir 27. ágúst 2021. Ef þið viljið breyta eða segja upp áskrift eftir að skráningartíma lýkur er það gert á netfanginu skagastrond@skagastrond.is Við munum áfram bjóða upp á hafragraut á morgnanna áður en kennsla hefst og verður hann í boði frá fyrsta hefðbundna skóladeginum, 24. ágúst frá klukkan 7:45. Haddý sér um grautinn í vetur. Sund verður áfram kennt tvo morgna í viku, mánudaga og þriðjudaga. Kiddi sér um akstur til og frá sundlaug. Að lokum minni ég aftur á að aðeins einn fylgi nemendum á skólasetningu og sami aðili fylgi systkinum. Ekki hika við að hafa samband við okkur ef spurningar vakna. Ég óska ykkur öllum velfarnaðar á nýju skólaári og hlakka til að vinna með ykkur. Skólaárið 2021-2022 hefst mánudaginn 23. ágúst og þar með er skóli settur. Kær kveðja Sara Diljá skólastjóri

Nú er hægt að skrá nemendur í frístund, við bendum á að öllum nemendum í 1.-4.bekk stendur til boða að vera gjaldfrjálst í frístund til 1.sept 2021.

Upplýsingar er varða skráningu í hádegismat ásamt skráningarkerfi er hægt að nálgast hér fyrir neðan.

Í ár kusum við að fara þá leið að taka upp leiksýninguna og bjóða upptökuna til kaups. Vegna reglugerðar um starfsemi grunnskóla í Covid var ekki mögulegt að sýna verkið fyrir fleiri en 20 manns í einu. Það var því ljóst að miðasala á leiksýninguna yrði ekki partur af fjáröflun nemenda í ár. Þess í stað freistum við þess að selja aðgang að upptökunni, svo að sem flestir geti notið og fjáröflun nemenda nái samt fram að ganga. Leiksýningin var tekin upp með nokkra hressa áhorfendur í sal þann 5. maí 2021. Fyrrum nemandi leiklistardeildar Höfðaskóla, Kristmundur Elías Baldvinsson, var að ljúka námi í kvikmyndagerð frá Borgarholtsskóla. Hann mætti vel græjaður í Fellsborg, tók sýninguna upp og klippti. Til þess að horfa á verkið þarf að senda póst á hofdaskoli@hofdaskoli.is og fylgja leiðbeiningum sem verða sendar um greiðslu. Að því loknu fáið þið sendan hlekk á sýninguna á YouTube. Góða skemmtun! Hér er hægt að nálgast leikskrána.

Hefð er fyrir því að nemendur í 10. bekk fari í skólaferðalag að vori. Stundum hefur verið farið til útlanda en að þessu sinni var ákveðið að fara í innanlandsferð og fara um Norðurland, enda hefur það uppá margt að bjóða. Nemendur, með dyggri aðstoð foreldra, söfnuðu fyrir skólaferðinni og vija þakka öllum þeim er studdu við þá í fjáröflun vetrarins. Hér fyrir neðan er ferðasaga þeirra :)

Skólaslit Höfðaskóla voru haldin í dag með óhefðbundnu sniði. Nemendur komu saman í heimastofunum sínum og tóku á móti einkunnarblöðum. Nemendur í 10.bekk mæta hinsvegar á morgun til útskriftar sem haldin verður í kirkjunni. Við vonumst til að geta haldið hefðbundin skólaslit vorið 2022.

Haustið 2019 var skipuð umhverfisnefnd í Höfðaskóla með það að markmiði að verða skóli á grænni grein og geta sótt um Grænfána. Á heimasíðu Landverndar segir m.a. að skólar á grænni grein styðji við umhverfismennt, menntun til sjálfbærni og almennt umhverfisstarf á öllum skólastigum. Mikil vinna hefur átt sér stað undanfarin tvö ár þar sem stigin hafa verið skrefin sjö sem þarf að uppfylla til þess að hljóta fánann. Fulltrúi frá Landvernd tók út vinnuna hjá okkur í síðustu viku og í dag var fáninn loks dreginn að húni. Það var því stór stund þegar fulltrúar nemenda í umhverfisnefnd, þær Lárey Mara Velemir, Súsanna Valtýsdóttir og Elísa Bríet Björnsdóttir veittu fánanum viðtöku frá Alexöndru Jóhannesdóttur, sveitarstjóra, sem var mætt fyrir hönd Landverndar. Þessar stúlkur hafa unnið mikið og gott starf í umhverfisnefnd, þær hafa setið þrjá fundi á önn, séð um dreifingu umhverfissáttmála, komið skilaboðum af fundum til samnemenda sinna og setið úttektar fund með Landvernd svo dæmi séu tekin. Við höldum ótrauð áfram og stefnum að sjálfsögðu að því að fá endurnýjun á fánanum eftir tvö ár.

Undanfarna tvo daga hafa nemendur á öllum stigum skólans verið mikið úti. Á miðvikudaginn fór unglingastigið í ratleik og meðan yngsta og miðstig hjóluðu útað sandlæk og léku sér þar. Á fimmtudag fór 9.bekkur að gróðursetja meðan 8. og 10.bekkur týndu rusl. Yngsta og miðstig fóru í ratleik. Veðrið hefur verið eins og best verður á kosið og allir, bæði nemendur og kennarar, orðin ansi sólkysst.

Kæru skólavinir Nú er þessu óvenjulega skólaári að ljúka, skólaári sem hefur einkennst af breytingum fram og aftur vegna heimsfaraldurs og hafa foreldrar/forráðamenn, nemendur og allt starfsfólk skólans sýnt ótrúlega þolinmæði og seiglu í þessu öllu saman. Það var frekar súrt að geta ekki haldið sameiginleg skólaslit í Fellsborg eins og við erum vön, en við gerum það besta úr stöðunni eins og við höfum gert síðan þetta ástand hófst allt í mars 2020. Skólaárið sem nú er liðið var fjölbreytt, skemmtilegt, krefjandi og óvenjulegt. Við lærðum margt á fyrsta árinu okkar sem skólastjórnendur og er óhætt að fullyrða að annað árið hafi ekki kennt okkur neitt minna. Við erum ótrúlega þakklátar fyrir þá þolinmæði og þann skilning sem skólasamfélagið allt hefur sýnt í þessu ástandi öllu. Skólaárið 2020-2021 hófst mánudaginn 24. ágúst 2020 þegar nemendur mættu á óhefðbundna skólasetningu í sínum heimastofum þar sem ekki var hægt að hittast í kirkjunni eins og vaninn er. Við upphaf skólaársins voru 78 nemendur skráðir í skólann og nú við skólalok eru þeir 79. Skólastarfið einkennist af þeim takmörkunum sem okkur voru sett hverju sinni og var ýmislegt sem þurfti að blása af, þar má nefna Reykjaskólaferð 7. bekkjar, valgreina helgar unglingastigs og fyrri þemaviku þess sama stigs. Fresta þurfti árshátíðinni okkar í þeirri von um að hægt væri að halda hana síðar á skólaárinu sem varð svo ekki og voru atriði nemenda tekin upp og send foreldrum/forráðamönnum. Það var þó margt sem við gátum gert, margar spennandi valgreinar á unglingastigi, við gátum sett upp leikrit sem tekið var upp og verður upptakan til sölu á næstu dögum, nánar auglýst síðar. Unnin voru mörg spennandi verkefni og hélt umhverfisnefndin vel á spilunum til þess að hægt væri að sækja um Grænfána og gleður okkur að tilkynna að Höfðaskóli er nú orðinn skóli á grænni grein og verður fánanum flaggað von bráðar. Breytingar á starfsmannahaldi hafa orðið á skólaárinu, Inga Jóna Sveinsdóttir fór í fæðingarorlof og Fjóla Dögg Björnsdóttir kom til baka eftir samskonar orlof. Nú er skipulag næsta skólaárs í undirbúningi og verða allar upplýsingar um umsjónarkennara og starfsmannahald sendar út í ágúst. Skóladagatal næsta árs bíður samþykktar fræðslunefndar og verður sett á heimasíðu um leið og hægt er. Skólaslit 1.-9. bekkjar fara fram á morgun, fimmtudag, hér í skólanum. Því miður geta foreldrar ekki verið viðstaddir að þessu sinni. Skólaslit hjá 10. bekk fara fram á föstudaginn og verða haldin í kirkjunni. Við þökkum fyrir gott samstarf á skólaárinu og minnum á mikilvægi þess að skólasamfélagið vinni saman að því að skapa hér jákvæðan skólabrag. Með þessum tvískiptu skólaslitum segjum við skólaárinu 2020-2021 slitið, njótið sumarsins og við hlökkum til að hitta alla aftur í haust, á hefðbundinni skólasetningu. Með sumarkveðjum Sara Diljá og Guðrún Elsa

Heil og sæl Síðasta heila vikan í Höfðaskóla þetta skólaárið gekk vel. Nemendur hafa verið í námsmati og brallað ýmislegt annað skemmtilegt þess á milli. Í næstu viku verða uppbrotsdagar hjá okkur þriðjudag, miðvikudag og fimmtudag. Allt nánara skipulag þeirra daga mun berast foreldrum/forráðamönnum frá umsjónarkennurum. Tekin hefur verið ákvörðun um að færa skólaslit 1.-9. bekkjar fram á fimmtudag í næstu viku v. samkomutakmarkana. Þann dag ætlum við að vera í útivist um morguninn, grilla saman í hádeginu og svo halda nemendur í sínar heimastofur með umsjónarkennurum og eiga þar notalega stund áður en haldið er í sumarfrí um klukkan 13:30. Frístund verður með hefðbundnu sniði þann dag. Því miður getum við ekki boðið foreldrum að taka þátt í stundinni að þessu sinni. Á föstudag verða skólaslit hjá 10. bekk kl. 17:00 í kirkjunni en þau verða nánar auglýst í næstu viku. Við vonum að þið eigið góða langa helgi Með góðum kveðjum Sara Diljá og Guðrún Elsa