Höfðaskóli

Heil og sæl Vikan var stutt hjá okkur, aðeins þrír skóladagar eftir gott vetrarfrí. Hingað í skólann mættu svo hinar ýmsu furðuverur á miðvikudaginn, öskudag, og var kennslu slitið klukkan 12:00 og héldu nemendur þá af stað í söng leiðangur um samfélagið. Foreldrafélög leik- og grunnskólans stóðu svo fyrir öskudagsskemmtun í félagsheimilinu Fellsborg og er ekki annað að heyra á nemendum en að þau hafi skemmt sér mjög vel. Myndir hér. Nemendur í 1. og 2. bekk skelltu sér í leiðangur í góða veðrinu í morgun og skoðuðu spjallbekkinn fyrir víkina ásamt því að rifja upp gamla takta og leika sér á lóð leikskólans. Myndir hér. Næsta vika er síðasta vika febrúarmánaðar og eina vika mánaðarins þar sem eru fimm heilir skóladagar. Nemendur 10.bekkjar halda yfir á Sauðárkrók fimmtudaginn 26.feb og heimsækja FNV. Skoða skólann, fræðast um námsframboð og lýkur heimsókninni með leiksýningunni Stella í orlofi í uppsetningu nemendafélags FNV. Föstudaginn 27. febrúar verður glitrandi dagur í Höfðaskóla en þann dag ætlum við að glitra með Einstökum börnum og vekja þannig athygli á degi sjaldgæfra sjúkdóma og heilkenna. Á heimasíðu Einstakra barna má finna ýmsar upplýsingar sem gott er fyrir öll að kynna sér. Við vonum að þið njótið helgarinnar Með góðum kveðjum Guðrún Elsa og Berglind Hlín

Sæl öll Vikan sem er að líða var heldur betur fjölbreytt. Síðastliðinn miðvikudag var 1-1-2 dagurinn en hann minnir okkur á neyðarnúmer allra landsmanna, 112. Það er mikilvægt að minna á þetta númer af því þetta er eina númerið sem landsmenn þurfa að þekkja í neyð. Við fengum í heimsókn til okkar slökkvilið, lögreglu, sjúkrabíl og björgunarsveit, nemendur fengu að fara út og skoða bílana og spjalla við viðbragðsaðila.Einnig komu í heimskókn Sigrún Líndal og Telma Bjarnadóttir og kynntu, fyrir öllum nemendum skólans, hutverkt sitt sem vettvangsliðar. Við þökkum öllum þeim sem komu að þessum degi kærlega fyrir, ómetanlegt fyrir nemendur skólans að fá að sjá tækjakost sem og hitta viðbragðsaðila og geta spurt spurninga. Myndir frá þessum degi hér. Í morgun voru nemendur 1. og 2. bekkjar með leiksýningu. Nemendur úr elstu tveim árgöngum leikskólans Barnaból komu á generalprufu kl. 9:00 og svo mættu foreldrar og aðstandendur ásamt mið og unglingastigi skólans kl. 11:00. Frábær sýning hjá krökkunum og allir stóðu sig gríðarlega vel. Myndir frá sýningunni hér. Nú er framundan vetrarfrí í Höfðaskóla föstu-, mánu- og þriðjudag og kennsla hefst aftur miðvikudaginn 18.febrúar. Þann dag ætlum við að halda upp á öskudaginn, mæta í búningum og gera okkur glaðan dag. Nemendum 1.-4.bekkar stendur til boða að mæta í frístund og fara með hópnum milli fyrirtækja og syngja fyrir nammi. Vonandi ná allir að hlaða batterýin og koma hress og spæk úr vetrarfríi. Með góðum kveðum Guðrún Elsa og Berglind Hlín

Í morgunkaffinu í dag fengu allir nemendur skólans tækifæri til að smakka hefðbundinn íslenskan þorramat. Nemendurnir voru duglegir að stíga út fyrir þægindarammann og smakka á hinum ýmsu kræsingum eins og súrum hrútspungum og hákarli ásamt hinum sígóða harðfisk. Gaman að halda í gamlar hefðir á þorranum. Fyrir þá sem vildu eitthvað annað var líka boðið upp á ljúffengan hafragraut, ávexti og brakandi ferska gúrku. Myndir af nemendum á yngsta stigi að smakka má sjá hér Myndir af nemendum á yngsta stigi að smakka má sjá hér

Febrúar er genginn í garð og eins og undandarið þá hefur veðrið leikið við okkur. Krakkarnir voru heldur betur ánægð með snjóinn í morgun. Starfsdagur og foreldraviðtalsdagur voru í byrjun vikunnar. Kennarar fengu fræðslu um framfarastiga í námi og kennslu sem og gerð kennslu og námsáætlana. Við þökkum foreldrum fyrir komuna, ávallt gott að hittast og ræða málefni nemenda. Næsta vika er stutt í annan endan þar sem nemendur og starfsfólk eru á leið í vetrarfrí, 13., 16. og 17. febrúar. Við komum svo endurnærð til baka og skellum okkur þá beint í öskudagsgleði. Í næstu viku ætlum við að vera með lítið þorrablót á þriðjudaginn í kaffitímanum og fá þá nemendur að smakka aðeins af hinum helstu þorraréttum. Við vonum að þið njótið helgarinnar Með góðum kveðjum Guðrún Elsa og Berglind Hlín