Fréttir

Í dag er síðasti skóladagur nemenda í Höfðaskóla þetta skólaárið. Í vikunni höfum við lokið námsmati, tekið til og verið með uppbrotsdaga. Fyrir hádegi í dag eru allir nemendur í íþróttahúsinu í allskyns flipp íþróttum og enda svo daginn með umsjónarkennurum. Skólaslit Höfðaskóla fara fram kl. 13:00 í dag, í Hólaneskirkju og vonumst við til að sjá sem flest. Við þökkum fyrir skólaárið sem nú er liðið og vonum að þið hafið það gott í sumarfríinu. Með góðum kveðjum Sara Diljá og Guðrún Elsa

Í dag mættu nemendur skólans kl. 9:00. Flakkað var milli stöðva þar sem ýmislegt var í boði að klippa, líma, lita, leika og einnig að fara í íþróttahúsið og sprikla. Enduðum svo öll í pylsupartýi í skólanum þar sem Finnbogi grillaði hátt í 200 pylsur.

4. og 5. bekkur nýtti síðasta tímann fyrir hádegi úti í góða veðrinu. Þeim var skipt í hópa og þurftu að leysa verkefni sem fólst í því að finna ákveðna hluti. Þau þurftu svo að búa til listaverk úr því sem þau fundu. Þetta var virkilega skemmtilegt og sköpunargleðin fékk að njóta sín.

Nemendur í 6. - 7. bekk fóru í vettvangsferð með kennurum sínum í gær í Útbæinn. Þar tók Einar Þorleifsson, náttúrufræðingur hjá Náttúrustofu Norðurlands á móti okkur og gekk með út að nýja fuglaskoðunarhúsinu, ásamt því að fræða okkur um þær fuglategundir sem sáust. Nemendur voru mörg hver með fuglabækur og sjónauka með sér sem juku upplifunina. Við sáum æðarkolluhreiður, fjölda fýla á varpstað og kríurnar gerðu óvænta árás á hluta hópsins. Einnig tók Guðmundur Egill Erlendsson hjá Björgunarsveitinn Strönd á móti nemendum og fræddi þau um starfsemi og tækjakost sveitarinnar. Að lokum hittu nemendur svo Reyni Lýðsson hjá Fiskmarkaði Íslands sem fræddi þau um ýmislegt tengt Fiskmarkaðnum, löndunarþjónustu og útgerð. Þessi vettvangsferð heppnaðist mjög vel og nemendur urðu margs vísari um þessar stofnanir og fuglalífið á Höfðanum.

Það er nú ekki hægt annað en að nýta veðurblíðu eins og dagurinn í dag hefur uppá að bjóða. Nemendur á yngsta stigi hafa verið úti meira og minna í allan morgun, fóru í göngutúr, fjöruferð og hafa síðan verið að leika sér á skólalóðinni.

Nemendur í 8. bekk skelltu sér í fjárhúsin hjá Dagnýju Rósu umsjónarkennara sínum í dag. Björn bóndi tók á móti þeim og leiddi þau í allan sannleikann um sauðburð. Það hittu þau nokkra heimalinga, gáfu þeim að drekka, klöppuðu krúttlegum lömbum, fræddust um mismunandi sauðfjárliti, sauðfjármörk og merkingar og drukku í sig sveitailminn. Við þökkum Birni bónda og Dagnýju kærlega fyrir heimboðið

Nú þegar næst síðasta skólavikan er rúmlega hálfnuð eru nemendur að ljúka við ýmis verkefni, hér má sjá myndir af verkefnum miðstigs í textílmennt.

Nemendur í 1. - 4. bekk fengu skemmtilega heimsókn í dag. Lögreglan kom og var með ýmiskonar fræðslu, hjóla og hjálmaskoðun. Við þökkum Ásdísi, Söru og Hrafnhildi fyrir komuna.

Í dag kusu nemendur Höfðaskóla í krakkakosningum á vegum Umboðsmanns barna. Á Krakkarúv eru kynningarmyndbönd frambjóðenda sem nemendur horfðu á, áður en gengið var til kosninga. Við sendum niðurstöður til Umboðsmanns barna og verða heildarniðurstöður birtar að kosningum loknum. Við munum birta niðurstöður skólans að kosningum loknum. Svona verkefni er frábært í lýðræðiskennslu og þjálfun í að vera upplýstur borgari í lýðræðissamfélagi. Nemendur yngsta stigs fóru síðan öll saman niður í eldhús og fengu sér kosningakaffi.Nemendur yngsta stigs fóru síðan öll saman niður í eldhús og fengu sér kosningakaffi.