Fréttir

Það er ansi viðburðarík vika að baki í Höfðaskóla. Á mánudaginn vorum við með menntabúðir og opið hús sem var vel sótt og er alltaf skemmtilegt. Við fengum marga góða gesti til okkar og krakkarnir stóðu sig öll mjög vel í sínum verkefnum. Á miðvikudaginn var söngsalur, á fimmtudag jólaföndur og í dag var boðið upp á piparkökur og kakó í nestistímanum. Sérlegur aðstoðarmaður við kakógerðina var Ragnar Viðar, nemandi í 1. bekk og stóð hann sig með stakri prýði. Nemendur í 1.-5. bekk fóru einnig upp í Fellsborg nú í morgunsárið og dönsuðu Zumba. 10. bekkur skreytti jólatréð okkar, svo það er klárt fyrir litlu jólin. Myndir frá deginum í dag eru hér. Nú er heldur betur farið að styttast í jólafrí. Á mánudaginn ætlum við að byrja daginn í friðargöngu, labba saman stuttan hring um bæinn okkar og væri gott ef nemendur kæmu með LED kerti með sér í skólann. Þann dag ætlar Ástrós Elísdóttir að heimsækja okkur og lesa jólasögu og Jón Ólafur Sigurjónsson (Jonni húsvörður) ætlar að spila undir í nokkrum jólalögum fyrir okkur. Í hádeginu á mánudaginn verður möndlugrauturinn okkar góði og eru nemendur beðnir um að koma með plastskál og skeið með sér í skólann. Engin kennsla verður eftir hádegi en frístund með hefðbundnu sniði. Á þriðjudaginn eru litlu jólin okkar, en nánari upplýsingar um þau koma frá umsjónarkennurum. Skólinn hefst kl. 9:00 þann dag og halda nemendur í jólafrí kl. 12:00. Ekki verður boðið upp á hafragraut þann dag og ekki frístund eftir hádegi. Jólasöfnunin okkar gengur vel og hafa velunnarar skólans einnig lagt söfnuninni lið. Ef einhver vill taka þátt í að safna fyrir Jólasjóð Skagastrandar og Skagabyggðar má hafa samband við okkur á hofdaskoli@hofdaskoli.is, koma við hjá okkur eða senda einhvern með framlag til okkar í skólann. Þessu verður öllu komið til skila eftir að litlu jólunum er lokið. Nú er síðasta helgin fyrir jól framundan og eflaust nóg að gera hjá flestum. Við vonum þó að allir nái að staldra aðeins við og njóta með sínu nánasta fólki, því þegar öllu er á botninn hvolft er það samveran með fólkinu sem okkur þykir vænt um sem skiptir mestu máli. Við vonum að þið njótið helgarinnar Með góðum kveðjum Sara Diljá og Guðrún Elsa

Frá því að skóli var settur í haust hafa nemendur í 6. og 7. bekk farið út á mánudögum og föstudögum og gengið u.þ.b. eina mílu í hvert skipti. Gaman er að segja frá því að aldrei hefur þurft að fella niður göngutúrana vegna veðurs. Við vonum að það verði eins eftir áramótin.

Í dag var jólaföndur hjá öllum nemendum skólans. Föndurstöðvar voru víðsvegar um skólann og gátu nemendur flakkað á milli og fundið eitthvað við sitt hæfi. Notaleg stund þar sem mörg glæsileg listaverk voru föndruð. Myndir hér.

Í gær buðu nemendur í einum af list- og verkgreinahópunum í 4.-7. bekk nokkrum á leiksýningu, en þau voru búin að setja saman jólaleikþátt. Virkilega skemmtilegt og vel útfært hjá þeim.

Í gær fengu nemendur dýrindis jólamat í hádeginu og borðuðu allt upp til agna. Það þarf þó enginn að örvænta, boðið verður upp á jólamat aftur á föstudag og þá er hægt að fá sér aftur. Myndir hér.

Í dag komu Hugrún og Elvar aftur í heimsókn til okkar og við sungum nokkur jólalög saman. Skemmtileg jólastund. Fleiri myndir komnar í jólasöngsalbúmið okkar hér.

Kæru foreldrar grunnskólanemenda á Skagaströnd Eins og mörgum er kunnugt, þá stendur yfir innleiðing laga um samþætta þjónustu í þágu farsældar barna, sem í daglegu tali eru kölluð farsældarlögin. Nú er kominn nýr og aðgengilegur vefur sem kallast Farsæld barna og þar má finna nánari upplýsingar um hvað löggjöfin felur í sér og hvert hlutverk tengiliða er. Einnig má sjá aðgengilegt myndband sem lýsir í stuttu máli því sem lögin innihalda. Samkvæmt lögunum eiga börn og foreldrar að hafa greiðan aðgang að þeirri þjónustu sem þau þurfa og að þau fái rétta aðstoð á réttum tíma, frá réttum aðilum. Með því að tengja þjónustuna saman og vinna í sameiningu að farsæld barna verður auðveldara fyrir börn og foreldra að fá aðstoð við hæfi. Börn og foreldrar þeirra hafa aðgang að tengilið í skóla. Á heimasíðu skólans má sjá hver hefur hlutverk sem tengiliður í Höfðaskóla. Hlutverk tengiliðar er fyrst og fremst að veita upplýsingar, aðstoða foreldra og barn og styðja við samþættingu á fyrsta stigi í samræmi við óskir foreldra og/eða barns. Í flóknari málum hafa börn og foreldrar aðgang að málstjóra hjá Félags- og skólaþjónustu A-Hún eða þar sem þarfir barns liggja hverju sinni. Foreldrar og börn geta leitað sjálf beint til tengiliðar eða sent beiðni um samþættingu þjónustu beint til tengiliðar.

Mánudaginn 11. desember voru menntabúðir og opið hús hjá okkur í Höfðaskóla. Nemendur kynntu bæði verkefni og ýmsar aðferðir sem þau nota í verkefnavinnu fyrir gestum og gangandi. Að venju var viðburðurinn vel sóttur og þökkum við öllum sem komu kærlega fyrir komuna. Það gleður okkur alltaf mikið þegar fólk gefur sér tíma í dagsins önn til að stoppa við hjá okkur og sjá afrakstur mikillar vinnu hjá nemendum. Fleiri myndir hér.

Áfram líða dagarnir í desember og við færumst nær jólum. Í þessari viku unnu nemendur ýmis verkefni, undirbjuggu menntabúðirnar og opna húsið sem verður n.k. mánudag og margt fleira. Við fengum heimsókn frá Hugrúnu og Elvar í tónlistarskólanum sem aðstoðuðu okkur með jólasöngstund sem var mjög skemmtileg, þau ætla að koma aftur til okkar í næstu viku. Í gær spiluðu nokkrir nemendur skólans á jólatónleikum tónlistarskólans og stóðu sig með stakri prýði. Við erum mjög stolt af tónlistarskólanum okkar og því frábæra starfi sem þar er unnið og hvetjum ykkur til að fylgjast með fréttum úr þeirra starfi á heimasíðunni þeirra. Litlu jól nemenda verða 19. desember og ætlum við að halda okkur við fyrirkomulagið sem við höfum verið með undanfarin ár hvað varðar pakkaskiptin. Í ár hafa nemendur kosið að styrkja Velunnarasjóð Skagastrandar og Skagabyggðar líkt og í fyrra og koma nemendur ekki með pakka heldur óskum við eftir því að hvert heimili leggi 1000 krónur í púkk ef heimilin hafa tök á. Starfsfólk skólans mun einnig styrkja sjóðinn í stað þess að skiptast á gjöfum. Í dag fer elsta systkini á hverju heimili heim með umslag og þar má setja aurinn í og loka fyrir áður en því er skilað aftur í skólann. Styrknum verður svo skilað til sjóðsins á litlu jólunum. Mánudaginn 11 .desember n.k. verður opið hús og menntabúðir hjá okkur frá kl. 16:00-18:00 í Höfðaskóla og hvetjum við öll sem vilja til að koma við hjá okkur, sjá hvað nemendur eru að fást við og skoða skólahúsnæðið. Þann dag ætlum við einnig að vera með jólapeysudag og hvetjum alla sem vilja til að mæta í jólapeysum. Þriðjudaginn 12. desember n.k. heldur nemendafélagið jólaskemmtun í íþróttahúsinu fyrir 1.-4. bekk frá kl. 16:30-18:00. Þar verður án efa líf og fjör. Miðvikudaginn 13. desember n.k. stendur foreldrafélagið okkar svo fyrir viðburð í skólanum frá kl. 17:00-19:00 þar sem nemendur geta komið með sín eigin piparkökuhús og skreytt þau. Nemendur þurfa að mæta í fylgd með fullorðnum. Fimmtudaginn 14. desember n.k. verður svo jólaball hjá leikskólanum þar sem eldri systkini mega mæta með og verða eflaust margir nemendur frá okkur á þeirri skemmtun. Það er því ansi margt framundan og alveg eðlilegt að ekki sé hægt að taka þátt í öllu. Það er ekki síður mikilvægt að staldra aðeins við og njóta augnabliksins með fólkinu sínu. Við minnum á mikilvægi þess að nemendur borði og sofi vel þegar annirnar eru svona miklar. Við vonum að þið njótið helgarinnar Með góðum kveðjum Sara Diljá og Guðrún Elsa

Nemendur í áhugasviðsvalgreininni skreyttu piparkökur í dag og höfðu gaman af. Það er alltaf gaman að brjóta upp hefðbundna kennslu af og til. Fleiri myndir hér.