Fréttir

Þetta dýr sköpuðum við í sameiningu við listamenn úr Nes listamiðstöð. Við byrjuðum á því að taka pappakassa í sundur og máluðum báðar hliðar, önnur hliðin var litrík og hin svört og hvít með mynstri. Pappinn var skorinn í strimla og við mótuðum úr þeim dýr sem átti að líkjast hesti. Við ákváðum að gera mjög stóran hest og var hann síðan festur saman með heftum. Finnst ykkur þetta líta út eins og hestur? Nemendur: Fanndís Alda, Filip, Freydís, Halldóra, Helgi Karl, Hörður Bjarni, Joshua, Karítas, Katrín Sara, Kristján Sölvi, Snædís Stefanía, Sólrún, Victoría. Kennarar: Lavenia og Kristbjörg. Aðstoðarmenn: Halla María og Moritz.

Nemendur í 2.bekk settu á sig svunturnar í morgun og gerðu ljúffengar kókoskúlur við mikinn fögnuð, myndirnar lýsa gleðinni.

Kæru foreldrar og forráðamenn, Nú er föstudagur runninn upp og enn ein viðburðarík vikan að baki í Höfðaskóla. Við viljum þakka öllum kærlega fyrir frábæra mætingu á haustfundina sem haldnir voru í vikunni. Það var einstaklega ánægjulegt að sjá svo marga foreldra og geta átt góð samskipti um skólastarfið framundan. Þessa vikuna hófum við lesfimikannanir sem munu halda áfram fram í næstu viku. Nemendur í 1.-7. bekk fengu góða heimsókn frá fulltrúum verkefnisins "List fyrir alla", sem kynntu fyrir þeim spennandi lestrarkeppni sem skólinn okkar tekur þátt í. Nemendur fylgdust af athygli og sýndu strax áhuga á þátttöku. Berglind Björnsdóttir frá SSNV heimsótti unglingastigið og kynnti fyrir þeim ungmennaþingið sem haldið verður 7. október í félagsheimilinu á Blönduósi. Hún hvatti nemendur okkar til þátttöku og vakti áhuga þeirra á að láta raddir sínar heyrast í málefnum sem þeim eru mikilvæg. Minnum á að útikennsla er mikilvægur þáttur í skólastarfinu okkar og ALLTAF er farið út, óháð veðri. Því er afar mikilvægt að nemendur séu klæddir eftir veðri og með viðeigandi útiföt meðferðis daglega. Einnig viljum við árétta að Höfðaskóli er símalaus skóli. Við biðjum foreldra vinsamlegast að tryggja að nemendur skilji síma sína eftir heima, afhendi þá ritara eða geymi þá slökkta í töskunum sínum á skólatíma. Góð samvinna heimilis og skóla er grundvöllur árangurs í námi og þroska nemenda. Við þökkum ykkur fyrir gott samstarf hingað til og hlökkum til framhaldsins. Við óskum ykkur ánægjulegrar helgar Guðrún Elsa og Berglind Hlín

Nemendur í fyrsta bekk gerðu kókoskúlur í dag, það vakti mikla lukku og gleði hjá þeim. Látum myndirnar tala sínu máli :)

Nemendur eru að vinna hörðum höndum að skapandi stærðfræðiverkefni sem er að ganga mjög vel hjá þeim. Verkefnið felst í því að hanna eigin fjárrétt, með öllum þeim hólfum og smáatriðum sem þeim finnst þurfa að vera, og tengja saman teikningu, mælingar og útreikninga. Í vinnunni þurfa þau að leggja áherslu á nákvæmni, nýta mismunandi form og mælitæki og reikna bæði flatarmál, ummál, rúmmál og horn og fleira. Til að gera áskorunina skemmtilegri fengu nemendur einnig tækifæri til að prófa sig áfram með snúninga og hlutföll, sem gerir verkefnið enn fjölbreyttara. Myndir hér

Kæru foreldrar/forráðamenn, Fjölbreytt og viðburðarík vika er að baki hjá okkur í Höfðaskóla. Nemendur hafa nýtt góða veðrið og verið mikið úti við nám og leik, eins og sjá má í frétt okkar um útikennsluna á heimasíðu skólans. Við viljum minna á mikilvægi þess að nemendur séu klæddir eftir veðri, sérstaklega nú þegar haustið er gengið í garð. Útikennsla er fastur liður í skólastarfinu og því nauðsynlegt að börnin komi með viðeigandi fatnað, svo sem regnklæði, vettlinga og húfur eftir aðstæðum. Gaman er að segja frá því að hænuungarnir okkar dafna vel í góðu dekri nemenda og starfsfólks. Þeir hafa verið uppspretta mikillar gleði í skólastarfinu. Í næstu viku fara fram haustfundir með foreldrum og umsjónarkennurum. Við hvetjum alla foreldra eindregið til að mæta, enda eru fundirnir mikilvægur vettvangur til að ræða skólastarfið og kynnast betur því sem framundan er á skólaárinu. Nánari upplýsingar um tímasetningar fundanna hafa borist foreldrum í tölvupósti. Við óskum ykkur ánægjulegrar helgar Guðrún Elsa og Berglind Hlín

Útikennslu stundirnar fara vel af stað á öllum stigum. Yngsta stig hefur verið að fara út og spá í haustinu skoða laufin, grasið, leika á aparóló eða fara í fjöruna við Hrafná. Miðstig er að byrja á sínu verkefni en við höfum fengið leyfi til að útbúa okkur smá svæði upp við Höfðann sem við ætlum að þróa í sameiningu. Unglingastig eru einnig að útbúa svæði en þau hafa valið sér svæði við tjaldsvæði og höfum við fengið leyfi til að þróa það áfram. Unglingastig veltir nú fyrir sér hvar best sé að nálgast steypu til að steypa niður drumba. Í þessa drumba munu þau síðan fá kennslu við að vefa net þar sem þau ætla að útbúa leik og slökunar svæði. Á næstu dögum unglingastig fara af stað í að sækja um styrki svo við getum sem best þróað þetta verkefni áfram. Þau eru líkleg til að fá lánuð verkfæri og jafnvel gæti verið að þau munu heyra í einhverjum í bæjarfélaginu til að aðstoða okkur. Ef einhver býr yfir þekkingu eða lumar á drumbum, böndum eða einhverju sem gæti nýst í verkefnið má endilega heyra í okkur í skólanum.

Nemendurnir á unglingastigi bökuðu bananabrauð sem þau höfðu síðan með morgunmatnum. Verkefnið fól í sér heilmikla hagnýta stærðfræði þar sem nemendur þurftu að beita þekkingu sinni á hlutföllum og mælingum. Þau fengu uppskrift en þurftu að reikna sjálf út magn innihaldsefna út frá þeim fjölda banana sem var til reiðu. Þetta krafðist þess að þau umbreyttu uppskriftinni, reiknuðu hlutföll og öðluðust þannig dýpri skilning á því hvernig stærðfræði nýtist í daglegu lífi. Það var ánægjulegt að sjá hversu mikil samvinna og lausnamiðuð hugsun átti sér stað við þetta verkefni. Bananabrauðið vakti gríðarlega mikla lukku og hvarf á augabragði.

Gleði ríkir í skólanum okkar þessa dagana því fjórir nýir meðlimir hafa bæst í hópinn. Um er að ræða krúttlega hænuunga sem vekja mikla athygli og lukku meðal nemenda og starfsfólks. Myndir hér

Haustið setur skemmtilegan svip á skólastarfið þessa dagana. Fyrstu sex vikur skólaársins eru helgaðar þemanu "haust" þar sem allir bekkir taka virkan þátt í fjölbreyttum verkefnum tengdum haustinu. Nemendur á miðstigi söfnuðu laufblöðum af ýmsum trjátegundum, lærðu að þekkja þau og búa til listræn verk úr þeim. Verkefnið styður við náttúrufræðikennslu og eflir skilning nemenda á árstíðabreytingum. Myndir hér