Fréttir

Í dag er alþjóðlegi vöffludagurinn. Foreldrafélag skólans færði okkur vöfflumix frá Vilko og steiktum við vöfflur fyrir nemendur og starfsfólk skólans og buðum starfsfólki tónlistarskólans yfir í kaffi. Skemmtilegt uppbrot og ekki annað að sjá en öll væru himinsæl :)

Áfram líður tíminn og farið að síga á seinni hluta mars mánaðar. Vikan hjá okkur var ljúf og góð, veðrið var gott og nemendur mikið úti við. 5. bekkur fór í heimsókn á heimilisiðnaðarsafnið sem var mjög skemmtilegt, frétt og myndir frá því hér. Nemendur í 8. og 9. bekk eru að selja happdrættismiða til styrktar komandi útskriftarferðar hjá þeim. Við hvetjum öll til að næla sér í miða, enda vinningarnir með glæsilegasta móti. Sjá hér. Á mánudaginn fengum við Grænfánann afhentan í annað sinn sem var mjög skemmtilegt. Við erum ákaflega stolt af því að vera skóli á grænni grein. Á morgun, föstudag, er starfsdagur og því hvorki skóli né frístund þann dag. Starfsfólk ætlar á námskeið með öðru starfsfólki sveitarfélagsins sem verður án efa gagnlegt. Í næstu viku verður margt um að vera hjá okkur. Undirbúningur fyrir árshátíð fer á fullt en hún verður haldin 3. apríl, nánar auglýst síðar. Íþróttadagur yngsta stigs verður haldinn miðvikudaginn 26. mars frá 14-16 en þann dag eiga öll að mæta, hvort sem þau eru í frístund eða ekki þar sem um tvöfaldan dag er að ræða. Fimmtudaginn 27. mars fara svo nemendur 10. bekkjar í PISA könnun fyrir hádegi og eftir hádegi fáum við unglinga frá Hvammstanga og Húnabyggð í heimsókn á valgreinadag. Alltaf nóg um að vera hjá okkur :) Við vonum að þið njótið helgarinnar Með góðum kveðjum Sara Diljá, Guðrún Elsa og Berglind Hlín

Í dag fóru nemendur 5.bekkjar í heimsókn á Heimilisiðnaðarsafnið á Blönduósi. Heimilisiðnaðarsafnið var upphaflega opnað árið 1976 á 100 ára afmæli Blönduósbæjar sem verslunarstaðar. Það voru konur innan raða Sambands austur-húnvetnskra kvenna, sem eru samtök kvenfélaganna í hérðinu, sem lögðu grunninn að safninu. Það má segja að Heimilisiðnaðarsafnið geymi fyrst og fremst hina gleymdu iðju frá fortíð til nútíðar. Lögð er áhersla á að veita innsýn í vinnu kvenna og karla sem fram fór á heimilum og var stór þáttur hins daglega lífs. Í safninu má greina hluta af atvinnusögu þjóðarinnar og sjá hvernig sjálfþurftarbúskabur og heimilisiðja mæta nútíma viðskiptabúskap á seinni hluta nítjándu aldar og fram á þá tuttugustu. Við þökkum kærlega fyrir móttökurnar.

Happdrætti til styrktar útskriftarferðar nemenda í Höfðaskóla. Fjöldi glæsilegra vinninga. Dregið verður 2. apríl. Miðaverð - 1 miði 3.000kr. - 2 miðar 5.000kr. - 3 miðar 7.000kr. - 5 miðar 10.000kr. Hægt er að panta miða með því að senda hafa samband við einhvern af nemendunum og/eða foreldra þeirra en þau ætla einnig að ganga í hús á Skagaströnd. Leitað var til fyrirtækja og einstaklinga í heimabyggð og víða af landinu. Við þökkum þeim innilega fyrir veittan stuðning.

Í dag var mikill gleði dagur þegar við fögnuðum því að hafa fengið útnefningu sem skóli á grænni grein í annað skipti og drógum Grænfánann að húni. Halldór oddviti kom og aðstoðaði okkur við verkið. Það er alltaf gleðilegt að uppskera :)

Í gær brugðu nemendur 9. og 10. bekkja sér til Reykjavíkur á iðn- og verkgreinasýninguna “Mín framtíð” í Laugardalshöll. Þar kynntu þau sér fjölbreytt námsframboð hjá framhaldsskólum landsins og hinar ýmsu iðn- og verkgreinar á vegum fagfélaga. Myndir hér.

Vikan í Höfðaskóla gekk vel, veðrið lék við okkur og það birtir með hverjum deginum sem líður. Nemendur fengust við ýmis verkefni og við reynum að vera dugleg að setja fréttir á heimasíðuna sem og myndir. Í gær fóru nemendur í 9. og 10. bekk til Reykjavíkur á sýninguna mín framtíð og gekk ferðalagið vonum framar og voru krakkarnir til fyrirmyndar í einu og öllu. Í gær fóru einnig nokkrir nemendur á skíði í Tindastól og skemmtu sér vel. Í kvöld fara nemendur í 8.-10. bekk á söngvakeppnina Norðurorg sem er undankeppni fyrir söngvakeppni Samfés. Keppnin verður haldin á Sauðárkróki þetta árið og verður eflaust mjög skemmtilegt hjá þeim. Mánudaginn 17. mars n.k. ætlum við að flagga Grænfánanum í annað skipti þar sem við vorum að fá endurvottun. Það er alltaf gaman að uppskera eftir góða vinnu. Föstudaginn 21. mars n.k. verður starfsdagur í skólanum, en þann dag ætlar allt starfsfólk sveitarfélagsins að fara saman á námskeið sem verður án efa bæði gagnlegt og skemmtilegt. Við vonum að þið njótið helgarinnar Með góðum kveðjum Sara Diljá, Guðrún Elsa og Berglind Hlín

Í dag fóru nemendur í valgreininni útivist og skíði á skíði upp í Tindastól. Öll stóðu þau sig frábærlega, veðrið var með besta móti og færið gott. Góður dagur með flottum krökkum. Myndir hér.

Sæl öll Vikan í Höfðaskóla leið hratt og var afar fjölbreytt. Á mánudaginn héldum við upp á bolludaginn, og fengu allir nemendur skólans ljúffenga bollu í morgunkaffinu. Á sprengidaginn, þriðjudag, var boðið upp á saltkjöt og baunir í hádeginu. Vikan náði svo hápunkti á miðvikudaginn þegar öskudagurinn var haldinn hátíðlegur. Nemendur og starfsfólk mættu í alls konar búningum, og var sannkölluð skemmtun í loftinu. Öskudagsball var haldið í íþróttahúsinu kl. 16:00 fyrir alla og síðar um kvöldið í félagsmiðstöðinni fyrir unglingana. Myndir frá deginum má nálgast hér. Sundkennsla hófst í vikunni, og að því tilefni ákvað veðrið að stríða okkur aðeins – en það var auðvitað ekkert sem hörkutól Höfðaskóla réðu ekki við! Mánudaginn næstkomandi mun Einar Óli Fossdal, sjúkraflutningamaður, halda skyndihjálparnámskeið fyrir nemendur í 9. og 10. bekk. Þá fara nemendur í þessum bekkjum á fimmtudaginn til Reykjavíkur á stóru framhaldsskólakynninguna Mín framtíð í Laugardalshöll. Nemendur yngsta stigs hafa verið dugleg að nýta fjölbreytt veðrið undanfarið til útiveru, og því skiptir miklu máli að allir séu vel klæddir til að geta notið hennar sem best. Að lokum má nefna að undirbúningur fyrir árshátíðina okkar, sem fer fram 3. apríl, er hafinn!